Папулярныя прозвішчы жыхароў Гайнаўскага павета на пачатку ХХІ ст.

Аннотация

Мэтай даследавання быў аналіз папулярных прозвішчаў жыхароў Гайнаўскага павета на пачатку XXI cт. Прадметам даследавання зʼяўляліся прозвішчы, якія паводле колькасці носьбітаў займалі на тэрыторыі гэтага павета 20–40 месцы. Праведзены аналіз датычыў наступных прозвішчаў: Pawluczuk, Sawczuk, Sacharczuk, Wołkowycki, Sadowski, Gawryluk, Leoniuk, Oniszczuk, Daniluk, Jakoniuk, Niczyporuk, Jakubowski, Fiedoruk, Jakimiuk, Androsiuk, Sajewicz, Ostaszewski, Roszczenko, Romańczuk, Sidoruk.

Прозвішчы былі апісаны паводле наступнай схемы:

a) вымаўленне прозвішча ў мясцовай гаворцы,

b) колькасць носьбітаў прозвішча ў краіне,

c) распаўсюджанне прозвішча,

d) сканцэнтраванне носьбітаў прозвішча ў Падляшскім ваяводстве,

e) прысутнасць носьбітаў прозвішча па-за межамі Падляшскага ваяводства,

f) колькасць носьбітаў прозвішча ў Гайнаўскім павеце,

g) адсотак носьбітаў прозвішча ў Гайнаўскім павеце на фоне агульнай колькасці ў Польшчы,

h) месца Гайнаўскага павета ў краіне паводле колькасці носьбітаў прозвішча,

i) праўдападобная этымалогія i матывацыя прозвішча,

j) роднасныя прозвішчы.

Найбольш папулярным прозвішчам ў Гайнаўскім павеце на пачатку XXI ст. аўтар прысвяціў асобны артыкул, у якім апісаў 20 антрапонімаў.

Дадзены аналіз антрапонімаў паказаў, што сістэма прозвішчаў жыхароў Гайнаўскага павета захавала ў значнай ступені свой традыцыйны ўсходнеславянскі характар. Ёй характэрныя патранімічныя прозвішчы, якія пераважаюць на ўсходнеславянскіх тэрыторыях і якія ўзніклі ад імён грэчаскага паходжання. Гэтая сістэма ўвабрала ў сябе рысы ўласцівыя асобным усходнеславянскім мовам, а таксама польскай мове, якая адыграла значную ролю ў яе фарміраванні.